Joh 17 | OPM | STEP | Ihama Jisas oh aw teinong watahangop. Watahama Ata inahatin sut oh gin hahmur. Go kakdah han ihirnong gonsi nohe hrepnong mat papatmur. Nohe hrepnong mat papatim gin go norhe kis mat papat han ihirnong eimat paten dasi matinmur napotporhan noh ama ihirnong eimat paten da ohsi deipatmur. Noh ihtin han hat pat ohoh ihan go nohnong amam armisi han nahatinmur. Nahatporhan noh ama amam armi da orhorsi it at gonong armi mat napaptepramur rim gorhornong mameng moh naporpatmur.

John 17

Jisas oh itap ohnong Noh at gwe ma natamreipat oh gin namamen deimur potip ohe meng oh

1 Ihama Jisas oh aw teinong watahangop. Watahama Ata inahatin sut oh gin hahmur. Go kakdah han ihirnong gonsi nohe hrepnong mat papatmur. Nohe hrepnong mat papatim gin go norhe kis mat papat han ihirnong eimat paten dasi matinmur napotporhan noh ama ihirnong eimat paten da ohsi deipatmur. Noh ihtin han hat pat ohoh ihan go nohnong amam armisi han nahatinmur. Nahatporhan noh ama amam armi da orhorsi it at gonong armi mat napaptepramur rim gorhornong mameng moh naporpatmur. 3 Eimat paten dasi ham ma patepri oh mamaru hat pateprimur. Arpin Got gonongsi; gorhe darhetip brer Jisas Krais nohnongsi nuhutnongwi Ihit ihat pati han yot ma hapat daham nuhutnong am hat paten ohe da orhorwi tei dahat tei dahat patiru hat orhorwi pateprimur. 4 At noh gwe natamreindin oh mamen matmur. Ma mamen mat oh gonong kakdah moh winsi han nahatmur. 5 Ihat ohoh ihan ginhe rih go mong erer oh na tarpat patin orhor nohnong winsi han naham nadaptuhut napaptesuhru it ginhe amaru hat orhor inahatinmur pongop.

Jisas oh orhe pinggit pisasuh han ihir yah hat ha patengwe rim Got ohnong adahamtip ohe meng oh

6 Jisas oh itap ohnong Go kakdah han maihirnong Moh norhe han ihirmur. Ihan Jisas orhe han amtipor daham norhe han ma nadeipat ihirnong oh norhor At oh ihtin han hat patmura; ihtin han hat patmur por gorhe ma ihat pat meng ohwi pot pisapatmur. Imat por pinggit pisapatin ihir gorhe mengnongwi amram dindeiptimur. 7 Ihtiperhan noh gorhe ma naporpat meng oh porpatmur. Porpatin ihir Arpin menghe daham dindeiptimur. Dimara nohnong Oh arpin Got oh darhetporhan orhe patdapat apdap han ma hapat dahaptimur. Dahama gwe ma napripat erer oh orhe bes teidapat apripat ma hapat dahaptimur. 9 Ama ihat dahapti ihir yah hat orhor ha patengwe rim noh ire paten meng oh adahanahapatmur. Kakdah morhe danong hat ma pati bap ihir yah hat ha patengwe rim na dahanahapatmur. Gorhe kis mar nohe hrepnong matip han ihir gorhe hano rima ire yah hat paten meng ohwi dahanahapatmur. 10 Nohe erer oh gorhemur. Gwe erer oh norhemur. Ihtin ohoh ihan ihir nohnong winsi nahaptimur. 11 Noh kakdah moh mandam aprin hahmur. Ihir kakdah morhor indiprimur. Noh gwe patnong apripramur. Ihan at yah dasi han gorhe ma napripat kasip orhor ama kasip orhorsiwi ihirnong paptenmur. Papatin dite tit hanwi hat ma patiru ihirhe tit hanwi sa hat patepri. 12 Noh ihirsi patin gwe kasip oh napriporhan ama kasip ohsi noh yah mar papatmur. Yah mat papatin yah hat orhorwi patimur. Tit han oh pokwi er danong ham orhe timbas hatin danong hat patmur. Timbas hatin danong hat ma pat oh rih ma brak matpa meng oh dam ha timdinoh rim orhe timbas hatin danong hat patmur.

13 Noh gin gwe patnong aprin kakduup hat patmur. Ihtin orhor gin noh gorhe patnong na apin patim orhor kakdah mamdapat orhor mameng moh gonong naporpatmur. Ma naporpat meng oh ihir amrama norhe amam hat pat morhor hatin hat ha isip hat patengwe rim naporpatmur. 14 Gwe meng oh noh pot mandamur. Pot mandatporhan kakdah morhe danong hat pati kuuhan ihirdapat norhe han ihirnong Gur Jisas ohe kakdah han nure da hatin na hat patru gin gurhe ihtin da hat pati moh por ihirnong garmar heisup deiptimur. 15 Kakdah kuuhan maihir imat garmar heisup deipti orhor noh At go norhe han maihirnong wan teinong dar matinmur na naporpatmur. Ihirsi tap hat patim patem ihirdapat er da mar er matipririm gorhe kasip oh ihirnong kasip mat paptenmur naporpatmur. 16 Noh kakdah han maire dahapti da hatin hat na pat hanmur. Nohe ihat ma dahat patru hat orhor norhe han maihirhe ihat orhor dahat patimur. 17 Gorhe meng oh arpin meng ohoh ihan ihirnong ameng ohsi ongeng mar gorhe natamreindin han bap mar paptenmur. 18 Gomdapat nohnong kakdah maire mutuhnong nadarhetipru nohdapat ihirnong kakdah han ire mutuhnong darherpatmur. 19 Gin noh maihir yahnap ham ongeng tahat orhorwi ha patengwe rim nohhe ongeng tahat patdapat orhor ire gwemat haputpora dahapatmur pongop.

Jisas orhe han ma hapri ire meng oh itap ohnong potip ohe meng oh

20 Jisas oh itap ohnong Noh gonong mama dahanahah oh gin nohsi mama pati han ire meng ohwi na dahanahah ohmur. Ire meng amram ma nohe danong ham Ohwi inahatin hatin hanwa ma naporipri han ire patepri meng ohsi tap mat dahanahahmur. 21 Ihan go nohsi patru noh gosi patru dite ihat tit hanwi hat patiru ihirhe ihat tit hanwi hat ha patengwemur. Ihat ditsi tap hat patin kakdah maihir wamara Jisas oh arpin Got ohe darhetip han ma hapat sa dahapri. 22 Go nohnong winsi nahapatru noh ihirnonghe imat winsi deipatmur. Imtiporhan ihir dite titwi hat patiru ihat orhor ha patengwe rim indeipatmur. 23 Tit hanwi hat ha patengwe rim ma indeipat oh go nohsi patru noh ihirsi ihat patepora daham indeipatmur. Indeipatin tit dawi hat pati da oh dam timdiporhan kakdah maihir wamara nohnong Orhor darhetip han ma hapat. Itap oh ama darhetip han ohe danong ham bopor mat papatru ire danonghe oh imat bopor mat papat ma hapat sa dahapri.

24 At go mong erer moh kopen na tarpat patin orhor go nohe danong ham bopor naham winsi nahat napaptesuhmur. Gwe norhe han ma nadeipat hansi; komdapat ma norhe han nadeipra hansi ihir nohe ma patepra tei oh tap hat pateprineng dahapatmur. Norhorsi patim gorhe winsi nahapat da oh wamar ha dahatingwemur.

25 At yahnap duung dasi hat pat han gonong kakdah morhe danong hat pati han ihir gonong hanhan hat patimur. Norhordapat oh gonong am hat patmur. Am hat patin norhe han ihir wanahama moh Got orhe darhetip han ma hapat napor am haptimur. 26 Am hapti ihirnong oh noh gwe mihat pat da meng oh ihirnong por pinggipatmur. Pinggipatru pinggitwi ma paptepra oh Noh ire tap patin gwe nohe danong ham bopor nahapatru hat orhor ihirnonghe bopor mat orhor ha paptenoh rim indeipramur pongop.